Inlawlawag ti Public Order and Safety Division (POSD) ti pakabuklan a napasamak iti likudan ti nagviral a video a nakairamanan ti maysa a babai ken dagiti a personnel daytoy itay nabiit.
Makita ngamin iti video ti panang-ala dagiti kameng ti POSD iti mais nga ilaklako ti maysa a babai.
Iti interview ti Bombo Radyo, kinuna ni Daryl Kim Longid, Chief ti Public Order and Safety Division a siguden nga illegal peddler ti nasao a babai.
Sigun kenkuana, kayat koma dagiti kakadwana nga ipaayan iti gundaway nga aglako ti nasao a peddler ngem adu ti insawangna a nasasakit a sasao kontra iti maysa nga enforcer.
Sakbay daytoy, inlawlawag dagiti enforcer iti maseknan a peddler nga iligal ti panaglakona iti uray ania latta dita a paset ken kinasaritada ti maseknan a sumurot iti opisinada tapno makisarita iti nasayaat.
Impetteng ni Longid a kanayonda a bagaan dagiti peddlers nga aglakoda kadagiti designated areas a naipaay kadakuada ngem saanda latta a sumursurot.
Inyunay-unayna pay nga ad-adda nga umado dagiti illegal pedlers iti siudad ti Baguio no kanayon a maap-apa dagiti personnel ti Public Order and Safety Division a mangipatpatungpal laeng iti trabahoda.
Impeksa ni Longid a nagviral ti nasao a video agsipud ta saan a maawatan dagiti tattao ti kaipapanan ti ar-aramiden dagitoy.
Impanamnama pay ni Longid a silulukat ti opisinada a mangipaay iti pakabuklan a video nu sadino, makita ti panang-abuso ti peddler kadagiti enforcer.//mp4
