Nakemmeg ti dua nga indibidual, maysa a lalaki ken babai, nga agtawen ti 23 ken 22, iti paset ti children’s park, Burnham Park, Baguio City gapu iti grave scandal.
Dagiti dua ket aginnayan-ayat nu sadinno, ti lalaki ket estudiante ken residente ti Pangasinan ken ti babai ket awanan trabaho ken residente ti La Union.
Maibasar iti inisial nga imbestigasion ti Baguio City Police Office-Police Station 7, bayat ti manarimaan a panagpatrolia ti nakasaksi a maysa a security guard iti nasao a disso, nakitana dagiti dua nga agbisbisong iti bleachers nga asideg iti comfort room.
Saan nga inkankano ti security guard dagiti dua ken intuloyna ti nagronda iti uneg ti nasao a parke.
Nupay kasta, idi nagsubli ti guard iti nasao a lugar, naimatanganna ti saan a nasayaat nga ar aramiden dagitoy.
Sumagmamano a minutos ti napalabas, nakitana a timmakder ti dua ken insimpa ti lalaki ti sapinna.
Iti dayta a gundaway, nagayab ti back-up ti nasao a security guard tapno maiturong dagiti dua iti Tourist Police Unit.
Apaman a naammuan dagiti otoridad ti Tourist Police Unit ti napasamak, tiniliwda a dagos dagitoy.
Iti agdama, nakasaganan dagiti kaskenan a dokumento para iti pannakaipila ti kaso kontra kadakuada.
Via Bombo Noveh Organo
