Inpakaammo ni National Bureau of Investigation (NBI) Director Melvin Matibag nga agsubli da Senador Alan Peter Cayetano ken Pia Cayetano iti pagilian ita a Sabado wenno intun bigat Setiembre 13, kalpasan ti panagbiyaheda iti ballasiw-taaw.
Sigun kenni Matibag, awan ti makitana a problema iti panagbiyahe ti agkabsat iti ballasiw-taaw.
Nupay kasta, kinunana a saan a mapabasol ti publiko kadagiti reaksyon ken komentoda gapu iti timing ti panagikkat daytoy.
Immunan a pinasingkedan ti Bureau of Immigration (BI) a pimmanaw dagiti dua a senador iti pagilian kalpasan ti report a naimatangan dagitoy iti Ninoy Aquino International Airport (NAIA).
Maipalagip a nangisubmitir ni Sen. Panfilo “Ping” Lacson kadagiti dokumento ken testimonya iti Office of the Ombudsman seknan iti maatap nga iregularidad kadagiti flood control projects iti Taguig City, a nainaig kenni Sen. Alan.
Malaksid iti dayta, im-imbestigaran ti NBI ti koneksion ni Sen. Alan kadagiti maatap nga iregularidad iti hosting ti Pilipinas iti 2019 Southeast Asian Games.