BAGUIO CITY- Nalaus ita ti panagyaman iti Bombo Radyo Baguio ti pamilya Escalante ken Lobiano kalpasan a nagkita manen ti lolada ken ti kabsat daytoy a nagsina, uppat a pulo a tawenen ti napalabas.
Sigun kenni Fretchen Monares, adda ti sakit ti lolada a ni Josefina Escalante Lobiano, 73-anyos, ken ti kiddaw daytoy ket makitana ti kabsatna a ni Patricio Escalante.
Kinunana a nagsirarak ti kasinsinna a ni Jhon Jhon Lobiano ken ti ikitna a ni Loreta Hernandez iti social media ta bareng makitada ni Tatay Patricio.
Kinuna ni Monares a nakitada laengen iti post iti page ti Bombo Radyo Baguio ti maipanggep kenni Tatay Patricio nga agilaklako kadagiti pigura ti pag-ong a naaramid babaen iti newspaper.
Innayunna a kinontakda ti numero nga adda iti fb post ken simmungbat ni Tatay Patricio ken sinarungkaranna idi kalman ni Lola Josefina sadiay San Andres, Manila.
Naammuan a naisina ni Tatay Patricio iti innem pay a kabsatna sadiay Baras Sto. Niño, Western Samar kalpasan a pimmanaw tapnu makigasangasat iti biag agingga a naisar-ong ditoy siudad ti Baguio.
Naituding a maitampok ti biag ni Tatay Patricio iti Negosyo at Empleyo sa Bombo a segment ti programa a Good Morning Philippines inton umay a Dominngo, Marso 19.
