BAGUIO CITY – Pimmusay ti 46-anyos a lalaki kalpasan a nadungpar ti motorsiklo bayat ti panagdalyasatda iti apokona iti kalsada idiay Quirino Highway, Purok 24, Irisan Baguio City.
Napasamak ti aksidente, pasado alas otso ti rabii idi Mayo 18 ngem pimmusay ti biktima idi kalman bayat nga agpapaimbag pailaeng iti ospital ti 7-anyos nga apoko daytoy.
Dagiti biktima ket residente ti San Carlos Heights, Irisan, Baguio City bayat a ti suspek a driver ti motorsiklo ket agtawen iti 38-anyos a residente met ti Labsan Street, Baguio City.
Maibasar iti imbestigasyon ti Baguio City Police Office Station 9, agbalballasiw dagiti aglolo iti kalsada idi killaat a nadungpar daytoy ti nakamotorsiklo.
Iti phone interview ti Bombo Radyo kenni PMaj. Marcy Grace Marron, Information Officer ti Baguio City Police Office, nag-overtake ti motorcycle rider rason a saanna a nakita nga adda ti bumalballasiw iti kalsada.
Iti agdama ket iggem dagiti otoridad ti suspek ken sumango daytoy iti kaso a Reckless Imprudence Resulting in Homicide and Serious Physical Injuries.
