![](https://img.bomboradyo.com/baguio/2021/05/AGRI-TOURISM-TRADE-FAIR.jpg)
BAGUIO CITY – Nailukaten ti Agri-Tourism Trade Fair ti Baguio City a masarakan iti Igorot Park nga agpaut agingga inton May 25.
Paset daytoy ti panangrambak ti siudad iti Urban Farmers and Fisherfolks Month.
Nagbalin a tampok iti panakailukat ti trade fair ti panangiyawat ni Department of Agriculture (DA)-Cordillera Regional Director Dr. Cameron Odsey iti cheke a naglaon ti P10-M iti lokal a gobyerno ti Baguio.
Sigun kenni Odsey, paset daytoy ti panangsuportarda iti urban agriculture project ti Baguio ken maaramat ti pondo iti panagtaraken ti manok, rabbit ken anig.
Tampok iti Agri-Tourism Trade Fair dagiti produkto ti umuna a batch dagiti partisipante nga urban farmers and fisherfolks agingga inton May 18 bayat a maitampok met inton May 19-25 dagiti produkto ti maikadua a batch dagiti partisipante nga urban farmers and fisherfolks.
Maangay met inton May 23 ken May 30 iti deppaar ti Session Road ti Farmers’ Sunday Market Showcase bayat nga inton May 27 ket ti coffee tree planting and clean-up drive iti sumagmamano a disso ti siudad.
Agleppas ti makabulan a selebrasyon babaen iti joint program ken farmers’ summit inton May 28 a pakabigbigan dagiti outstanding farmer leaders, senior farmers, young farmers ken farmer organizations malaksid pay iti workshop iti community-supported agriculture ken community-led agri-tourism.