BAGUIO CITY – Naisayangkat ti Agribusiness Support for Promotion and Investments in Regional Exposition wenno ASPIRE iti rehion Cordillera babaen iti panagbinnadang ti Department of Agriculture, Department of Trade and Industry ken Philippine Chamber of Commerce and Industry.
Dinar-ayan daytoy ti 111 a mannalon ken entrepreneurs wenno negosyante manipud iti nagduduma a paset ti Cordillera ken naitampok ditoy dagiti platforms para iti market matching, KADIWA retailing, agribusiness investment fora ken new normal marketing discussions.
Nakaipamaysa ti regional expo ita a tawen iti agribusiness resiliency wenno kinatibker dagiti negosyo iti baet dagiti karit nga ituntunda ti agdama a pandemya iti ekonomiya.
Inyunay-unay met ni DA-Cordillera regional director Cameron Odsey ti pagkasapulan para iti pananggundaway dagiti partisipantes, nangruna dagiti mannalon kadagiti agdama nga oportunidad iti baet ti pandemya ken kadagiti tulong nga ididiaya ti gobyerno para iti ad-adda pay a panakapasayaat ti abilidad ken kapabilidad dagitoy nga agbalin a naballigi a negosyante.
Dinakamatna nga agtultuloy ti panangsuportar dagiti nagduduma nga ahensia ti gobyerno kadagiti mannalon iti baet ti pandemya babaen iti agribusiness ken iti panangisuroda kadagitoy no kasano nga aramiden ti agribusiness iti sidong ti new normal.
