Pimmusay ti agsingin kalpasan a naaksidente dagitoy idiay Munguia, Dupax del Norte, Nueva Vizcaya idi laeng kalman ti malem, Pebrero 10, 2025.
Dagiti biktima ket agtawen ti 16 ken inauna nga anak, agnanaed idiay Bitnong, Dupax del Norte, Nueva Vizcaya.
Sigun iti ama dagiti biktima a ni Armando Balagat, nagawid dagiti annakna iti pangaldaw iti nasao nga aldaw tapno mangala kadagiti beans ken sayote a balunenda kuma para iti sports competition.
Kadawyan nga agmotmotor dagiti biktima gaputa addayu ti pagadalanda nga adda idiay Brgy. Munguia ken awan ti parapubliko a lugan iti lugarda.
Pasubli kuma dagitoy iti pagadalan idi napasamak ti aksidente.
Iti report ti Dupax del Norte PNP, adda iti agsinnabali a direksyon ti motor ken van a nakadungpar dagiti biktima.
Agkannigid koman ti van idi napasamak ti panagdinnungpar.
Kalpasan ti insidente, naglibas ti driver ti van ngem pinanawanna ti luganna.
Naiturong dagiti biktima iti ospital ngem agpada a saan a nakalasat dagitoy gapu iti nakaro a pannakadangran ti ulo ken bagi dagitoy.
Iti agdama, adda ti suspek iti panangaywan ti Dupax del Norte PNP.
Immuna a kiniddaw ti ama dagiti biktima a sumuko ti driver ti van tapno maipaayan ti hustisia dagiti annakna iti arapaapda nga agbalin a maysa a pulis iti maysa nga aldaw.
