BAGUIO CITY – Pimmusay ti maysa nga agtatakaw kalpasan a pinaltogan ti pulis a takawanda kuma sadiay Windy Hill, Buyagan, La Trinidad, Benguet idi kalman ti parbangon.
Iti panakiyuman ti Bombo Radyo-Baguio kenni PCI Carol Lacuata, information officer ti Cordillera PNP, kinunana a nakaengkwento ni SPO2 Noreen Bandao, a nakadestino iti Atok PNP ken residente iti nasao a lugar dagiti suspek nga agtakaw koma iti balayda.
Kinunana a takawan koma dagiti suspek ti balay ti pulis kalpasan a biniktimada ti kaarruba ti pulis ngem nakita daytoy ti pulis isut gapuna a ginandatna a kemmegen dagiti suspek.
Nupay kasta, killaat a pinaltogan ti maysa kadagiti suspek ti biktima ken sadiay a natamaan ti ngiwat ti biktima a pulis.
Kinuna ni Lacuata a sakbay a naulaw ni SPO2 Bandao ket nabaelan daytoy ti nagpaputok ti paltog ken sadiay a natamaan ti maysa kadagiti suspek a nabigbig a ni Jonathan Mayangao Cabradilla manipud Bauko, Mt. Province a rason iti dagus daytoy nga ipupusay bayat a nakalibas dagiti dadduma a suspek.
Narekober iti crime scene ti bag ti kaaruba ti pulis a naglaon ti kwarta ken dokumento, maysa a 9mm a paltog manipud iti pimmusay a suspek ken ti pangsuksukit dagiti suspek.
Iti agdama, addan iti nasayaat a kasasaad ti nasao a pulis.
Dinayaw pay ni Lacuata ti inaramid ti kaduada iti serbisyo ken inaramid laeng ni SPO2 Bandao ti sinapataan daytoy a mandato.
