
BAGUIO CITY – Kiniddaw ti Philippine Statistics Authority-Cordillera (PSA-CAR) iti central office ti pannakaituloy manen ti door-to-door collection ti demographic information kadagiti residente iti rehiyon.
Sigun kenni PSA-CAR Regional Director Villafe Alibuyog, daytoy ket tapno maipaayan iti gundaway a makapagrehistro dagiti saan a naakomodar para iti step 1 ti pannakaala ti national identification system.
Kinunana a maysa metlaeng daytoy a gundaway tapno makapagrehistro dagiti umili nga adda iti nasusulinek a lugar nga awanan iti gundaway a makapagrehistro babaen iti online.
Imbinglay ni Alibuyog a nalpasen ti door-to-door pre-registration no sadino ti laeng mabalin a pagparehistroan dagiti umili nga agtarigagay nga agala ti national ID ket babaen iti online.
Dagos met a sinuportaran dagiti miembro ti lokal a konseho ti nasao a banag.