BAGUIO CITY – Inaklon ti City Health Services Office ti Baguio a ngumatngato ti bilang dagiti umili nga agkasapulan ti tulong mainaig iti mental health.
Iti panakiuman ti Bombo Radyo Baguio kenni CHSO Mental Health Officer Ricky Ducas, imbinglayna nga innaldaw a maakaw-awatda ti tawag dagiti indibidual manipud ditoy siudad ken kabangibang a luglugar nga agkidkiddaw ti tulong mainaig iti mental health.
Sigun kenkuana, epekto daytoy ti aktibo a programada iti nasao a pakaseknan.
Dinakamatna nga innaldaw a a dumandanon iti 10-15 a tawag ti maaw-awatda bayat a 3-5 nga indibidual ti agturturong iti opisinada.
Kinunana a 12-anyos agingga 30-anyos dagiti kangrunaan a nakaumanda idi napalabas a tawen bayat a buklen met dagiti working force wenno 31-anyos nga agpangato dagiti kangrunaan nga agkidkiddaw ti tulong seknan iti mental health.
Imbinglayna a kangrunaan a pakaseknan dagiti nasao nga indibidual ket ti parikot iti pinansial ken pamilya a nangituntunda iti stress ken anxiety dagitoy.
Kagiddan iti daytoy, inyapelana ti panangipateg ti tunggal maysa iti salun-at, nangruna ti mental nga aspeto.
Imbinglay pay ni Ducas ti kinapateg ti panagkumusta iti maysa nga indibidual nangruna ita a pandemya tapnu maalay-ayan dagiti rikriknaen dagitoy.
