![](https://img.bomboradyo.com/baguio/2021/08/la-trinidad-trading-post.jpg)
BAGUIO CITY – Marikrikna ita dagiti vegetable truckers iti probinsia ti Benguet ti epekto ti agtultuloy a panagngato ti presyo dagiti produkto a petrolyo iti sangalubongan a merkado.
Iti interview ti Bombo Radyo Baguio, kinuna ni Rudy Bulawan, presidente ti Benguet Vegetable Truckers and Traders Association a maluglugi metten dagitoy nangruna ita a pandemya.
Inlawlawagna a manipud iti P15,000 a gastos dagitoy iti maysa a ’round trip’ paturong ken pasubli manipud Metro Manila ket nagbalin a gastos daytoy iti ‘one-way’ trip gapu iti kangina ti krudo.
Innayonna a no mamingsan ket ad-adda pay ti lugida gaputa saan a mapunno wenno kagudua laengen ti kapasidad ti 10-wheeler truck ti imet dagitoy nga ituntunda ti naksayan nga order dagiti buyers ti highland vegetables.
Dinakamatna nga epekto met daytoy ti panagraira dagiti smuggled vegetables manipud China a maiwarwaras ken mailaklako kadagiti nagduduma a merkado ken bagsakan areas sadiay Metro Manila.
Sigun pay kenni Bulawan, nagbalinen a tallo nga aldaw iti linawas ti panagisalogda kadagiti nateng manipud iti sigud nga innaldaw a panangibiaheda kadagiti nateng paturong sadiay Metro Manila.
Impettengna a dagitoy a sitwasyon ti nangipangato iti gastos dagitoy nupay dinakamatna a tapnu adda ti kanayonan a mapastrekanda ket ag-backload dagitoy iti nagduduma a produkto ken abono.
Kagiddan iti daytoy, iyap-apela manen ni Bulawan ti dagus a panag-aksion dagiti maseknan nga ahensia ti gobyerno ken dagiti otoridad iti pakaseknan dagiti stakeholders ti vegetable industry tapnu matulongan dagitoy ken ad-adda pay a mapadur-as ti industriya ti nateng iti pagilian.