BAGUIO CITY – Impanamnama ti DSWD-Cordillera nga agtultuloy ti panangdalus da iti listaan dagiti benepisyaryo ti Pantawid Pamilyang Pilipino Program (4PS) a nabigbig babaen iti Listahanan.
Iti interview ti Bombo Radyo Baguio, kinuna ni DSWD-CAR Regional Director Arnel Garcia a dumanon iti 61,094 a household ti miyembro iti 4PS iti rehiyon.
Dinakamatna nga adda ti 46 a household a nagraduaren bayat nga adda ti 667 a household a saan a nang-awat wenno nagpabus-oy iti nasao a programa.
Impeksa ni Garcia a kankanununganna ti direktiba ni President Ferdinand “Bongbong” Marcos Jr. a madalusan ti listaan ti nasao a programa tapno maikkat dagiti saan a maikari a benepisyaryo.
Impettengna a babaen iti daytoy ket maipaayan iti gundaway dagiti nakapila iti listaan nga agbalin a benepisyaryo ti 4PS.
Innaklon ni Garcia nga adda dagiti naipadamag a benepisyaryo a naglabsing iti pagalagadan ti 4PS kas ti saan nga umno a panakaaramat ti financial assistance a naipaay kadakuada.
Impaganetgetna nga adda metten dagiti sumagmamano a naballaagan gaputa nu saan nga agbalbaliw dagitoy ket maikkatda iti listaan ti 4PS.
