BAGUIO CITY – Kidkiddawen ti maysa a non-government organization ti panagtitinnulong dagiti nagannak, opisyales ken dagiti nagduduma nga ahensia ken institusyon para iti agtultuloy a panakaisuro dagiti ubbing, partikular iti sex education.
Sigun kenni Chi Laigo Vallido, advocacy and communication specialist ti Forum for Family Planning Development, Incorporated, dumanon iti 98 nga agtutubo iti rehion Cordillera nga agtawen iti 15 agingga 19 ti nasapa a naaddaan iti anak kas maibasar iti panagadalda idi napalabas a tawen.
Kinunana a nasken a nasapa paylaeng ket maadal dagiti agtutubo wenno ubbing dagiti dakes nga epekto ti teenage pregnancy wenno ti nasapa a panagsikog nangruna iti salun-at dagitoy.
Impeksana a kangrunaan a maapektaran ti napintas kuma a masakbayan ti agtutubo a nasapa a masikogan ken agbalin nga ina gaputa saan daytoy a makaturpos iti panagadal ken saanna a maaramid dagiti dadduma a kayatna a magun-od iti biag.
