BAGUIO CITY – Imbinsa-binsa ti maysa kadagiti speakers bureau iti Regional Development Council for Autonomy iti rehiyon Cordillera ti kinapateg iti otonomiya apaman a magun-od seknan iti panakapapigsa iti women sector.
Sigun kenni Dra. Paulina Sawadan, maysa kadagiti opisyal iti Cordillera For Autonomy, Peace and Development, dakkel ti akem dagiti babbai seknan iti panagprogreso ken panagrang-ay iti rehion.
Dinakamatna a nasken nga agtinnulong ti dagiti babbai ken lallaki tapno magun-od dagiti arapaap ti maysa a rehiyon kas otonomiya.
Mamati met daytoy a dakkel iti nagbaliwan wenno progreso iti panagraem ita kadagiti babbai nu idilig kadagiti napalpalabas a tawen.
Innayonna pay a nailanad iti linaon iti gakat iti organic bill wenno autunomy bill ti women empowerment pakairaman iti panakapapigsa ti youth sector ken multi-sectoral groups.
Gapu iti daytoy, napateg ti panakagun-od iti otonomiya ti rehiyon tapno naan-anay pay a maipaayan ti kinapateg dagiti babbai ken mapapigsa ken mapatibker pay dagitoy babaen iti panagkaykaysa ti umili.
Nagkari met dagitoy iti agtultuloy a panangikampanyada iti otonomiya kabayatan iti panagsapata dagitoy.//Bombo Raz Pagoli
