Pinaglibakan ni sigud a House appropriations panel chairperson ken Ako Bicol Party-list Representative Zaldy Co ti alegasyon a P13 bilyon insertions iti P6.3 -trillion national budget iti agdama a tawen.
Impaganetgetna a ti rumrummuar a banag ket saan laeng a naimbento wenno naaramid nu saan pay ket nalawag a politikal ti motibo ken naaramid tapno allilawen ti publiko ken mapabasol ti dadduma.
Innayonna pay a ti 2025 General Appropriations Act ken ti probisyon daytoy ket saan laeng a para kenkuana nga agdesision gaputa daytoy ket inaprobaran ti nangato ken nababa a chamber ti Kongreso a pinirmaan ni President Ferdinand Marcos Jr.
Sigun kenkuana, adda dagiti gundaway nga adda ti sumagmamano a probision a na-veto ken saan a nairuar ti pondo.
Ti nasao nga alegasion ket imbutaktak ni Navotas Representative Tobias Tiangco a nagtestigo iti Senate Blue Ribbon inquiry seknan iti flood control projects.
Karaman metlaeng ni Co a nairaman iti nairuar kadagiti kontrakto a da Sara ken Curlee Discaya a naipaayan ti awards ti proyekto.
Ni Co ket incorporator ti Sunwest Inc., ti maikalima a kangrunaan a flood control project contractors iti Bicol region.
