BAGUIO CITY – Nakasagana a denggen wenno ipangag ti Benguet General Hospital and Medical Center ti singasing ken pakaseknan dagiti pasyente para iti panakapasayaat ti serbisyo dagitoy.
Imbalikas ni BeGH Acting Chief Dr. Meliarazon Dulay nga no adda man ti pakaseknan dagiti pasyente wenno asinoman a naagrabyado ket personal nga idanonda iti opisinana tapno masungbatan daytoy.
Kagiddan iti daytoy, naragsak nga inwaragawagna a mangidiadiaya ti BeGH iti tulong pinansyal babaen iti pundo nga impaay ti Deparment of Health ken Provincial Local Government Unit.
Impanamnamana a mabalin a makaawat ti pinansiay a tulong ti asinoman a pasyente apaman nga idanonda iti social service office dagiti pakaseknanda tapno maasistaran dagitoy.
Kabayatana, imbinsa-binsana dagiti serbisyo nga ipapaay ti pasilidad dagitoy iti publiko no sadino kinunana a saan laeng nga ag-admitar iti COVID patient ti serbisyo dagitoy.
Kinunana a nakalukkat latta dagiti regular services kas ti operation dagiti pasyente ken laboratories partikular ti ultrasound, x-ray ken daduma pay.
Impettengna nga iti agdama ket maad-admitar dagiti COVID patient nga adda iti moderate ken critical a kasasaad bayat a maiturturong met dagiti symptomatic ken probable kadagiti isolation facility.
Inayonna pay ni Dr. Dulay nga ak-akomodaren metlaeng ti treatment facility dagiti asymptomatic a pasyente ken dagiti makapaspasar ti mild cases.
Impannakkelna a 24/7 wenno agpatnag nga operasyon ti molecular laboratory ti BeGH no sadinno 14% agingga 15% ti positivity rate a nairekord dagitoy sipud nangrugi ti operasyon daytoy no sadinno 85% kadagiti 100% a nakolektar a sample ket nag-negatibo iti COVID-19.
