BAGUIO CITY – Biagen manen ti lokal a gobyerno ti La Trinidad, Benguet ti Aksyon Barangay Kontra Dengue tapnu malapdan wenno makontrol ti ad-adda a panagadu ti kaso ti dengue fever iti masakupan ti munisipyo.
Iti interview ti Bombo Radyo Baguio, kinuna ni Mayor Romeo Salda nga iti agdama ket dumanonen iti 37 ti kaso ti dengue fever sadiay La Trinidad a bukbuklen ti 13 a lallaki ken 24 a babbai.
Innayonna a 12 manipud iti 16 a barangay ti La Trinidad ti nakailista iti kaso ti dengue fever nupay nakontrol metten ti nasao a sakit sadiay Barangay Shilan.
Gapu iti daytoy, kinunana nga isublida ti panangipa-uni iti municipal siren wenno tangguyob iti maysa a minuto tunggal alas-kwatro ti malem a mangisimbolo iti panakaisayangkat ti aggigiddan a panagdalus kadagiti disso a mabalin a pag-itlogan ti lamok iti masakupan ti La Trinidad.
Maipalagip nga adda ti ordinansa ti La Trinidad iti 4 o’clock “Stop, Look and Listen” Habit kontra iti dengue a nangrugi a naimplementar idi pay 2015.
