BAGUIO CITY – Awan pay ti panggep ti pamilya ti pimmusay a premature baby nu agipilada iti kaso kontra iti ospital sadiay Dagupan City, Pangasinan.
Immunan a pimmusay ti nasao a maladaga kalpasan a naikkat ti aparatus a naikabit iti bagi daytoy gaputa awanen ti pangbayad ti nasao a pamilya iti P1500 a nasken a bayadanda iti innaldaw para iti nasao a pasilidad.
Segun iti lola ti maladaga, saanda nga ammo nu mangipilada iti kaso kontra iti management ti nasao nga ospital gaputa iti agdama ket malamlamayan pay laeng ti apo daytoy.
Immunan nga immapela ti nasao a lola iti panagaksyon ti gobyerno iti saan a napintas a panglakagan ti nasao a pagagasan.
Maipalagip nga iti baet nga emergency ti sitwasyon ti anakna ket saan dagitoy nga inkaskaso dagiti hospital personnel agingga nga impaayda ti agarup P5000 nga abang iti pasilidad nga aramaten ti maladaga.
Malaksid iti daytoy ket inkalikagum ti ospital a P1500 a bayadanda iti innaldaw ken nu maliwayanda a bayadan daytoy ket imballaag dagiti adda iti ospital nga ikkatenda ti tubo a mangsupsuportar iti panaganges ti maladaga.
Mainaig iti daytoy ket kinuna ti Department of Health Cordillera a nasken a maireklamo ti nasao nga ospital iti DOH Region 1 gaputa nakalanad iti linteg a saan a mabalin nga agsingir iti anyaman a bayad nu ti pasyente ket adda iti emergency situation.
