BAGUIO CITY–Kinumpirmar ti Northern Luzon Command ti Armed Forces of the Philippines (AFP) ken ti Police Regional Office Cordillera nga adda ti innem nga aktibo a Kilusang Larangang Guerrilla Forces iti nagduduma a probinsia iti rehion.
Sigun kenni Lieutenant General Emmanuel Salamat, dadaulo ti Northern Luzon Command, bambantayanda ti aktbidad ti Leonardo Pacsi Command sadiay Ifugao, “Baggas” Command sadiay Kalinga, “Marco” Command sadiay Mt. Province, “Ampis” Command sadiay Abra ken dagiti KLG Fronts sadiay Apayao ken probinsia ti Benguet.
Puntiryada a marippuog dagiti Guerilla Fronts ti NPA nga agdakdakiwas iti rehion babaen iti balligi a pannakaiyuswat ti Joint Campaign Plan dagitoy a “Kapanatagan Cordillera”.
Mangnamnama daytoy a babaen iti nasao a plano ket mapapigsa ti opensa dagitoy kontra iti aniaman a panagtignay dagiti rebelde a grupo.
Inlawlawagna nga ikagkagumaan ti militar ken pulisia a marisot dagiti mapaspasamak a local armed conflict iti rehion babaen iti napudno a pannakitinnulong dagiti lokal a gobierno.
Umap-apela ti opisial kadagiti umili iti Cordillera a suporatanda ti AFP, PNP ken ti nasyunal a gobierno a mangrisot iti rinnupak a manglaplapped iti panagdur-as ti rehion.
