Pormal nga inyuswat ti Filipino-Chinese community ken iti lokal a gobierno iti siudad ti Baguio dagiti aktibidad para iti panangrambak iti Spring Festival 2026, a sumrek iti Year of the Fire Horse, iti City Hall idi kalman, Pebrero 9, 2026.
Sigun kenni Peter Ng, dadaulo iti Spring Festival 2026 celebration, ad-adda a namaris ken ad-adda a naragsaka ti panangrambak ita a tawen gapu iti nasayaan a koordinasion iti lokal a gobierno ken iti Filipino-Chinese community. Kinunana a panggep ti selebrasyon nga ipakita ti panagkaykaysa ken ti nasayaat a relasion para iti agtultuloy a panagdur-as iti Baguio.
Nangrugi ti Spring Festival iti siudad idi 1998 ken nagbalin a pormal a selebrasyon idi 1999 babaen iti maysa nga ordinansa.
Maisayangkat ti parada inton Pebrero 19, iti alas-tres iti malem, ken nasuspindir metten ti klase iti nasao nga aldaw tapno maipaayan ti gundaway dagiti estudiante nga agbuya.
Maisayangkat metlaeng ti maysa a gift-giving activity inton Pebrero 13 kadagiti pamilia a nakurapy idiay Barangay Middle Quirino Hill babaen iti panangidaulo iti City Social Welfare and Development Office.
Karaman pay iti aktibidad ti Spring Festival ken ti Little Chinatown showcase iti Session Road inton Pebrero 13 ken Pebrero 22, kasta metten ti Chinese New Year Fun Run iti bigatna.
