Nagtestigo ni aktres Maricel Soriano ita nga aldaw iti Senate panel ti public order and dangerous drugs kalpasan a nainaigda iti iligal a droga pakairamanan ni President Ferdinand “Bongbong” Marcos Jr., kas maibasar paylaeng iti agwarwaras a “confidential report” ti Philippine Drug Enforcement Agency (PDEA).
Sigun kenni Soriano, saanna nga ammo ti maipapan ti agwarwaras a dokumento gaputa saan nga agbasbasa daytoy.
Iti nakasagana nga statement ti aktres, naklaat daytoy idi naimbitaran a tummabuno ti hearing mainaig iti agwarwaras a dokumento ti PDEA.
Itay laeng nabiit, kinuna ni sigud a PDEA intelligence officer Jonathan Morales a pinirmaanna ti maatap a nagwaras a dokumento maipapan ti iligal a droga nga adda pakainaiganna kenni President Marcos ken ti nasao nga aktres.
Iti maiwarawaras a dokumento ti nasao nga ahensia a addaan ti petsa a March 11, 2012, nakalanad nga adda dagiti grupo ti artista ken politicians nga agus-usar ti iligal a droga iti uneg ti condominium idiay Makati City.
Bayat ti panagtultuloy ti imbestigasion ti Senado, inlawlawag ni Morales nga adda ti “typographical error” iti report maipapan iti numero ti condominium unit.
Nagkedked met ti management ti condominium nga iruar dagiti nagan nga agtagikua ti unit gapu iti pribado a rason ngem kinumpirmar ni Soriano a kukuana ti maysa kadagitoy ngem nailako idi tawen 2012.
Nu pay kasta, kinuna ti aktres a saanna a malagip ti bulan a nailako ti condominium ken inulitna a saanna a kukua daytoy sipud pay idi 2012—tawen a maipagarup a nairuar ti report ti PDEA sakbay ti operasion.
