BAGUIO CITY – Posible a mabaliwan dagiti pagaladagan nga impaulog ti lokal a gobyerno ti Baguio mainaig iti panagsarungkar iti Baguio Public Cemetery.
Iti panakiuman ti Bombo Radyo Baguio kenni City Administrator Bonifacio dela Pen֮a, kinunana a daytoy ket gapu iti baro a pagalagadan nga impaulog ti National IATF mainaig iti panakalagip ti Aldaw dagiti Minatay.
Dinakamatna a nasapsapa nga impaulog ti lokal a gobyerno ti Baguio dagiti pagalagadan para iti nasao a panawen, pakairamanan ti aldaw a panakairikep ti Baguio Public Cemetery ken iti schedule iti panagsarungkar kadagiti tanem sadiay.
Sigun kenkuana, pagsaritaanda paylaeng ti baro a pagalagadan para iti siudad.
Innayonna nga agtungpalda iti pagalagadan nga impaulog ti National IATF.
Maipalagip nga iti pagalagadan ti siudad ket mairikep ti Baguio Public Cemetery inton October 30 agingga November 3 bayat nga iti pagalagadan ti National IATF ket mairikep dagiti kamposanto inton October 29 agingga November 2.
