BAGUIO CITY – Mangrugin inton Dominggo, October 23 ti panaglako dagiti cutflower and ornamental plant growers sadiay La Trinidad, Benguet kadagiti sabong para iti panalagip ti aldaw dagiti minatay.
Maipasdek dagiti pwesto iti sangwanan a mismo ti public market sadiay Kilometer 5 ken mailako sadiay dagiti cut flowers ken potted plants a mapapataud kadagiti 12 a barangay ti La Trinidad.
Mangrugi inton bigat ti panakaibangon dagiti pwesto dagiti babbarangay ken agleppas met inton November 2 ti panaglako dagitoy kadagiti sabong.
Sigun kenni La Trinidad Trinidad Municipal Agriculturist Felicitas Ticbaen, adda latta dagiti mailako a sabong nga agtaud kadagiti babbarangay ti munisipyo iti baet ti panagdalapos ti bagyo a Maring.
Mangnamnama met daytoy nga adda latta ti gumatang kadagiti cutflowers ken ornamental growers, pakairamanan dagiti buyers manipud iti ruar ti munisipyo nga uray mairikep dagiti kamposanto inton October 29 agingga inton November 2.
Mangnamnama pay ni Ticbaen nga awan to manen ti maibelleng a sabong a kas iti napasamak idi napalabas a tawen gapu iti saan a panakagatang dagitoy sadiay Metro Manila.
