BAGUIO CITY-Impetteng ni Baguio City Mayor Mauricio Domogan nga awan ti pakainaiganna iti organisasyon a Bullion Buyer Limited a maysa kadagiti kooperatiba a mangididiaya iti libre a panagparehistro kadagiti interesado nga agpamiembro.
Kasaruno daytoy ti nagwaras a sayangguseng nga adda koneksion ti mayor iti nasao a kooepratiba.
Inlawlawag ti mayor a naimbitaran laeng daytoy iti naangay a launching ti nasao a kooperatiba sadiay Athletic Bowl.
Kinunana a kas maibasar iti naawatanna ket napintas ti panggep ti kooperatiba gaputa mangipaay dagitoy iti panggedan ken libre a panagparehistro.
Nupay kasta, idi laeng kanikuadua ket adda ti nagturong iti opisinana a mangkumkumpirmar nu pudno a saan a rehistrado iti Securities and Exchange Commission(SEC) ti nasao a kooperatiba.
Gapu iti daytoy ket imbalakadna a sukimatenda a naimbag ti organisasyon tapnu a saanda a maloko nangruna ta agraraira ti adu nga scammers ditoy siudad.
Innayonna a nasken met nga imbestigaran ti NBI ti nasao a kooperatiba kalpasan nga adda dagiti agrekrekalmo nga agkolkolektar ti Bullion iti kuarta kadagiti immunan a nagpamiembro ken naipanamnama kadakuada a makaawatda iti inisial ken binulan a “pay-out”.
