Pinaglibakan iti kampo ni VP Sara Duterte ti pammabasol a ni sigud a Negros Oriental representative Arnolfo “Arnie” Teves ti adda iti likudan iti pangta iti biag ni Ramil Madriaga, ken inawagan daytoy kas nakakatkatawa.
Sigun kenni Atty. Paolo Panelo Jr., legal counsel ni VP Sara Duterte para iti naipila a reklamo a perjury kontra kenni Madriaga, kinunana a “comical” ken nalawag a kinaulbod manipod iti saan a mapagtalkan wenno “polluted source.”
Impaganetgetna nga immuna a napaneknekan a saan a pudno ti statement ni Madriaga a binisita daytoy ni Duterte iti pagbaludan, maibasar iti kumpirmasion ni DILG Secretary Jonvic Remulla a ni Teves ti binisitana, saan nga isuna.
Innayon pay ni Panelo a sinabalian ni Madriaga ti statement wenno istoriana ken iti agdama ket mainanaig ni Duterte ken Teves iti mapapati a pangta iti biagna.
Iti tengnga daytoy, kiniddaw ni Chel Diokno a papigsaen ti seguridad ni Madriaga iti tulong iti National Bureau of Investigation, bayat a pinaglibakan ni Teves ti alegasion.
