BAGUIO CITY – Pinaglibakan ti Research Institute for Tropical Medicine (RITM) ti Department of Health (DOH) ti waragawag ni Baguio City Mayor Benjamin Magalong a dumanon iti 50,000 nga expired RT-PCR testing kits para iti COVID-19 ti inted ti RITM iti maysa a pribado a testing laboratory ditoy Baguio City.
Iti pammalawag ti DOH, awan ti expired testing kits a naited iti aniaman a laboratoryo kas maibasar kadagiti delivery records ken dokumento.
Inyunay-unayda nga ab-ababa ti shelf life dagiti test kits a dumanon laeng iti innem a bulan, a saan a kas kadagiti agas a dumanon iti tallo agingga lima a tawen.
Nailanad iti waragawag ti DOH a dagiti test kits ket fast-moving stock a nasken a dagus a maaramat nangruna ta maib-ibus ti ababa a shelf life dagitoy gapu iti panakaibiaheda ken dadduma pay a laboratory processes.
Nupay kasta, imbinglay ti DOH a tapnu maliklikan ti kapada a reklamo ket binukelda ti COVID-19 Laboratory Network Project Management Unit a mangipasigurado iti panakatutuk dagiti maipapaay a test kits.
Dinakamat met ni Mayor Magalong a naawatnan ti Comprehensive Technical Report ti RITM iti inreklamona nga expired COVID-19 test kits.
Immuna metten nga impaimana iti DOH ken iti IATF ti panakaimbestigar ti insidente.
