BAGUIO CITY – Nainget a pinaglibakan ni Mayor Benjamin Magalong ti alegasion nga adda ti naipaay a pasuksok iti pannakapili ti SM Prime Holdings Inc. kas Original Proponent Status (OPS) holder iti development project iti Baguio City Public Market.
Impannakkel ti mayor a mapaneknekan babaen iti rekord-na a nadalus ti pannakapili ti nasao a kompania.
Kinunana nga iti isyu ti Mamasapano Massacre ket saan daytoy a nagpaimpluwensia ken saan daytoy a nagbuteng kadagiti ninja cops isut gapuna a nadalus ti panangidaulona iti siudad.
Inyunay-unayna a patas ti pannakipaay iti SM iti OPS ken maitunos daytoy iti P4 ordinance gapu ta naadal a naimbag ti proposal ti kompania.
Innayon ni Magalong nga umdas ti proposal ti SM bayat a kurang ti indiaya ti Robinsons.
Inkari ti mayor a saan a mapolitika ken awan ti korapsion iti development ti merkado ti siudad ti Baguio.
Kabayatanna, kankanunungan ni City Administrator Engr. Bonifacio dela Peña ti desisyon ni Mayor Magalong mainaig iti panakaipaay ti OPS iti SM Prime Holdings.
Iti panakiyuman ti Bombo Radyo Baguio, inyunay-unayna metlang a saan a paylaeng a nangabak ti nasao nga kompanya ken ti laeng naited iti daytoy ket ti OPS a mangipablaak iti disenyo ken mangirugi kadagiti negosasyon para iti public-private partnership (PPP) deal iti city market project.
Kinunana nga manarimaan metlang dagiti sumaruno a proseso ti panagpili iti kasayaatan a kompanya a mangimplementar iti proyekto iti merkado publiko.
Inaklonna a saan a kabaelan ti lokalidad nga ipatungpal ti proyekto isunga nabukel ti PPP nga inaprubaran metlang ti lokal a konseho ti siudad.
Kasaruno dagitoy dagiti nagduduma a damag wenno sayangguseng a ti panakaipaay ti OPS ket ad-adda a panagbalin a pribado ti merkado publiko.
Kinunana pay nga impadas dagitoy nga dumawat iti proposal kadagiti bangko ken naduma-duma nga organisasyon ngem saan nga umdas ti pondo ti siudad a mangbayad iti amortization daytoy.
Nupay kasta, impasiguradona nga agtultuloy latta a nakalukat ti lokalidad iti publiko kabayatan nga agtultuloy ti nasao nga proyekto.
