BAGUIO CITY – Inyunay-unay ti dadaulo ti Benguet Agri-Pinoy Trading Center (BAPTC) nga awan ti kinapudno dagiti agwarwaras a damag iti social media nga adda ti pasugalan ken paginuman iti uneg ti pasilidad dagitoy.
Iti interview ti Bombo Radyo, kinuna ni Jesson Del-amen, Chief Operation Officer ti BAPTC, ti dakdakamaten dagiti tattao a pasugalan, pagbilliardan ken pag-inuman ket saanda a sakop gaputa ti BAPTC ket agserserbi laeng kas Vegetable Trading Area.
Impetteng ti opisyal a nu adda man ti makitada nga ag-in-inom ti arak iti uneg ti BAPTC ket papanawenda daytoy.
Inaklon pay ni Del-amen nga adda dagiti stall a maipapaabang iti uneg ti BAPTC ngem imparitda ti panaglako dagitoy ti arak ken sigarilyo.
Gapu iti daytoy, kidkiddawen ti opisyal iti publiko a saanda koma nga aramaten ti nagan wenno address ti BAPTC iti aniaman nga iligal nga aramid.
