Nilawlawagan ni Baguio City Mayor Benjamin Magalong ti alegasyon nga adda ti batching plant wenno pagkabkabilan ti grava ken semento iti Athletic Bowl.
Iti interview ti Bombo Radyo, kinuna ti mayor nga awan ti kinapudno daytoy.
Sigun kenkuana, imbes nga adda dagiti aggregates a nakawara kadagiti kalsada ket nasaysayaat nu adda dagitoy iti uneg ti Baguio Athletic Bowl.
Inlawlawag ni Mayor Magalong nga impaayanda ti konsiderasyon dagiti kontraktor tapno saanda nga ikabil dagiti aggregates iti kalsada nga ad-adda pay a makaipaay ti parikut kadagiti umili.
Dinakamatna nga agbaybayad dagiti kontraktor ti P20-K tunggal bulan ngem agingga laeng daytoy ita a bulan gaputa agleppas metten ti proyekto dagitoy.
Maipalagip nga itay kallabes ket adda metten ti naiparikep a batching plant gaputa nakalanad iti City Ordinance No. 43, series of 2007 a maiparit daytoy.//CaraS.
