Impaganetget ni Palace Press Officer Undersecretary Claire Castro nga awan ti nakaibatayan dagiti alegasyon ni Vice President Sara Duterte a supsuportaran ni President Ferdinand Marcos Jr. ti International Criminal Court (ICC) kontra kenni sigud a President Rodrigo Duterte.
Sigun kenni Atty. Castro, posible a resulta laeng daytoy ti pannakaupay ti Bise Presidente agsipudta, maim-imbestigaran ti amana iti ICC.
Impaganetget daytoy a 2017 a nangrugi ti kaso a naipila kontra iti sigud a presidente no sadino, private citizen paylaeng ni President Marcos Jr.
Inlawlawag ni Atty. Castro a tungtungpalen laeng ti Presidente ti agdama a linteg ken saan koma a mapabasol iti kaso a sangsangwen ti sigud a presidente.
Kabayatanna, kinuna ti palace officer nga awan paylaeng ti nagbaliwan ti takder ti administrasion seknan iti panagsubli ti Pilipinas kas miembro iti ICC agsipudta, awan paylaeng ti napagsaritaanda seknan iti daytoy.