BAGUIO CITY – Nagpalawag ti dadaulo ti Mankayan PNP mainaig iti alegasyon a naipadanun iti Sangguniang Panlalawigan (SP) ti Benguet seknan iti saanda a panangprotektar kadagiti umili sadiay Paco, Mankayan kabayatan ti panangtubngar dagitoy iti konstruksion ti kalsada sadiay babaen iti dakkel a kompanya ti minas.
Iti panagparang ni PCI Cliff Vencio, hepe ti Mankayan PNP iti sesyon ti SP, impalawagna a dagus nga adda ti nai-deploy a pulis kalpasan a naidanun kadakuada ti posible a naranggas a reaksion iti konstruksion ti kalsada sadiay Barangay Paco idi November 10.
Kinunana nga adda met ti impatulod ti Benguet PNP, partikular ti Provincial Public Safety Batallion sadiay Barangay Paco gapu iti mapapati a panakibiang dagiti dadduma a grupo iti nasao nga isyu.
Naamuan a naka-awat ti Committee on Mines iti SP iti reklamo mainaig iti maatap a saan a panangsalwad dagiti pulis kadagiti maseknan nga indibidual a nangtubngar iti nasao nga aktibidad ti kompanya ti minas.
Impalawag pay ni PCI Vencio nga awan ti pulis kabayatan ti panangputed dagiti kameng ti kompanya ti minas kadagiti kayo sadiay isut gapuna nga awan metlaeng ti nakemmeg dagitoy.
