BAGUIO CITY – Legal itan ti panagtrabaho dagiti 25 a gangannaet manipud China nga agtatrabaho iti manarimaan a P4.3-B Chico River Pump Irrigation Project sadiay Kalinga ken Cagayan.
Sigun DOLE-Cordillera Assistant Regional Director Jesus Atal Jr., daytoy ket kalpasan a nakompleton ti Alien Employment Permit dagiti nasao a trabahador iti proyekto a paset ti Build, Build, Build Program ti Duterte Administration.
Kinunana a nadiskobre nga awanan iti kaskenan a dokumento dagiti nasao nga intsik idi sinukimatda dagiti trabahador ti proyekto isut gapuna nga inkalikagumda ti panagala dagitoy iti nasao a permit.
Inlawlawagna a nagduduma ti espesiyalisasyon dagiti nasao nga intsik nga agtatrabaho iti proyekto kas iti panagaramat kadagiti teknolohiya iti panakaaramid ti irigasyon.
Maipalagip a minulta ti DOLE-Cordillera iti sag-P10,000 dagiti nasao a foreign workers gapu iti panagtrabahoda ditoy pagilian nga awanan ti permit bayat a namulta ti contractor ti proyekto iti dumanon P250,000 gapu iti panangimpleyona kadagiti foreign workers nga awanan ti kaskenan a dokumento.
