BAGUIO CITY – Sumangsango iti kaso a parricide ti maysa a baro kalpasan a pinapatayna ti bukodna nga ama sadiay Acupan, Virac, Itogon, Benguet idi rabii.
Iti panakiuman ti Bombo Radyo, kinuna ni PCI Eugene Raymundo, hepe ti Itogon PNP, a ti suspek ket 21-anyos bayat a ti biktima ket 51-anyos, tubo ti Tabuk City, Kalinga ken agpada dagitoy a residente iti nasao a lugar.
Kinunana a nakaawatda laengen iti awag manipud iti gwardiya ti maysa nga ospital ditoy siudad ti Baguio mainaig iti naitaray a biktima ti pammagsol sadiay.
Iti met inisyal nga imbestigasyon ti pulisya ket naamoan a nagiinom ti agama ken ti maysa pay a lalaki idi timmaud ti saan dagitoy a pinagkinaawatan.
Nangala ti suspek iti kutsilyo ken binagsolna ti kannigid a barukong ti amana.
Naitaray ti biktima iti ospital ngem naideklara a dead on arrival bayat a nakemmeg ti suspek.
Iti agdama ket awan pay ti desisyon ti pamilya ti biktima no agidatagda iti kaso kontra iti suspek.
