BAGUIO CITY – Sumangsango ita iti kaso a parricide ti maysa nga ama gapu iti panangpapatayna iti bukodna nga anak sadiay Malagnat, Pinukpuk, Kalinga idi rabii ti Lunes.
Iti interview ti Bombo Radyo kenni PMSgt. Zyg Liggayo, imbestigador ti Pinukpuk Municipal Police Station, binigbigna ti nasao nga ama a ni Mike Sema bayat a binigbigna ti anak a biktima a ni Julius Sema.
Kinunana a naka-awatda iti report seknan iti insidente ti pammaltog ken iti panagrespondeda ket naitarayen iti ospital ti biktima.
Nupay kasta, naamuanda a dead on arrival ti biktima iti pagagasan.
Nakikoordinar met dagiti pulis kadagiti kabagian ti agama agingga a napasukoda ti suspek ken narekoberda ti inaramat daytoy a paltog a caliber 38, maysa a basyo ti bala ken pito a bala.
Maibasar iti imbestigayon dagitoy, rabii ti Lunes ket naginom iti arak ti agama iti balay ti kabsat ti biktima ken kalpasanna ket immuna a nagawid ti anak iti balayda.
Nupay kasta, naamuan iti ina ti biktima a kabayatan ti panaginom iti arak ti agama ket timmaud ti saan dagitoy a panagkinnaawatan a nagresulta iti nabara a panagsinnungbatda.
Sinukon met ti ina ti asawana ngem iti panagawidda ket naaddaan dagitoy iti panagsinnungbat.
Ginandat ti biktima nga aganawa iti nagannakna a nagresulta iti ad-adda a panagunget ti suspek agingga nga inala ti suspek nga ama ti paltogna ken pinaltoganna ti tiyan ti anakna.
Iti agdama, adda paylaeng iti kustodiya ti Pinukpuk Municipal Police Station ti suspek bayat a maur-uray ti panakaipaulog ti desisyon para iti panakatingiting ti kaso daytoy.
Gapu iti daytoy, balballakadan ni Liggayo ti publiko a no aginom dagitoy ket kontrolenda ti kaadu ti inomenda ken no dagiti pamilya nga addaan problema ket napimpintas a liklikan dagitoy ti aginom.
