Imbinglay ni Interior and Local Government Secretary Jonvic Remulla a makitintinnulong kadagiti awtoridad ti ama ti estudyante a responsable iti shooting incident a napasamak idiay Ateneo de Zamboanga University ita a lawas.
Sigun pay kenni Secretary Remulla, awan ti makitkitada iti agdama a responsibilidad ti ama iti napasamak nga insidente.
Innayon daytoy a maymaysa ti menor de edad a nangplano ken nangipatungpal iti nasao nga insidente, aramat ti maysa a .40 caliber ken 9mm pistol a kukua ti ama na a maysa a correction officer.
Sigun kenni Bureau of Corrections (BOC) Commissioner Ariel Nepomuceno, nabati dagiti armas iti uneg ti lugan nga inaramat ti ama a nangitulod iti anak daytoy, rason tapno maala ti ubing ken maiyunegna iti pagadalan.
Kabayatanna, inlawlawag ni Remulla a ti piskalya ti agdesisyon nu ada ti responsibilidad ti ama a kasapulanna a sungbatan kas maitunos iti agdama a linteg.
Kas addang iti imbestigasyon, temporaryo pay laeng a naikat ti opisyal iti posisyon daytoy kas district commander ti Bureau of Corrections Enforcement and Security Services idiay Zamboanga Port. //𝕜𝕔𝕤//