BAGUIO CITY- Pinunas ni City Mayor Mauricio Domogan ti panagdanag ti publiko seknan iti posible a panakaipatungpal ti rehabilitasyon ditoy siudad ti Baguio kalpasan ti rehabilitasyon iti mabigbigbig a Boracay Island.
Daytoy ket kasaruno metlaeng ti waragawag ti Department of Tourism a maysa ti siudad kadagiti maipasedong iti rehabilitasyon kas iti Boracay Island.
Sigun kenni Baguio City Mayor Mauricio Domogan, agduma ti sitwasyon ti Boracay Island ken iti kasasaad ti siudad ti Baguio partikular iti isyu ti aglawlaw.
Gapu iti daytoy, kiniddawna ti panakitinnulong ti Office of the Congressman ken ti lokal a konseho ti Baguio a mangbigbig kadagiti maipatungpal a programa a para iti panakasalwad ti intero nga aglawlaw ti siudad.
Malaksid iti daytoy, imbilinna met laeng iti City Environment and Parks Management Office ti nainget a panangipagtungpalda iti Salaknib ti Waig Program nangruna iti panakadalus ti Balili River.
Kabayatanna, panggep met ti lokal a konseho ti Baguio a mangipatungpal iti environmental summit tapnu maamuan dagiti napintas a programa a maipatungpal iti siudad ti Baguio tapnu saanen a dumteng ti panawen a mairekomendar met ti panakadalus ti mabigbigbig a Summer Capital Of the Philippines.