BAGUIO CITY – Pinunas ti dadaulo ti Committee on Tourism iti lokal a konseho ti Baguio ti panagamak dagiti sumagmamano a residente ditoy siudad seknan iti posibilidad a maipasidong ti Baguio iti rehabilitasion kas iti napasamak iti Boracay Island.
Iti panakipatang ti Bombo Radyo kenni Councilor Elmer Datuin, kinuana nga agduma ti kasasaad ti Boracay ken ti siudad ti Baguio.
Inlawlawagna a ti Isla ti Boracay ket naideklara a kukua ti nasyonal a gobyerno bayat a ti siudad ti Baguio ket kaaduan a kukua dagiti pribado nga indibidual.
Kinunana a saan a rumbeng a maidilig ti parikot ti Boracay Island gaputa awan met ti nakaro nga environmental problem ti siudad ti Baguio.
Innayonna a normal laeng iti maysa a dumurdur-as a siudad dagiti bassit a parikot kas iti umad-ado a bilang dagiti lugan iti lokalidad a kangrunaan a mangrugrugit iti napintas a kalidad ti angin.
Nupay kasta, impetteng ti konsehal nga adda met dagiti agdama nga ordinansa ti siudad a makatulong iti panakasalaknib iti aglawlaw.
