Nainget ti panagbantay ken monitoring dagiti maseknan nga otoridad iti lebel ti danum iti Ambuklao Dam idiay Barangay Ambuklao, Bokod, Benguet kagiddan ti mapaspasaran nga epekto ti tropical storm Kristine.
Gapu iti dayta, inlukat met dagitoy dagiti sumagmamano a gate sadiay tapno makissayan ti nangato a lebel ti danum.
Impetteng met ni Barangay Kagawad Brian Dalilis a nangipayulog metten dagitoy iti advisories kadagiti umili seknan iti panangilukatda iti gate ti nasao a dam.
Nagballaag metlaeng daytoy kadagiti umili sadiay a liklikan ti rumuar iti pagtaenganda, liklikan ti panagturong kadagiti karayan tapno maliklikan ti insidente.
Iti agdama, agtultuloy latta ti panagbantay dagitoy iti nasao a dam.
Kabayatanna, maiyunay-unay met iti publiko nga agbalin a naridam ken agbalin nga updated partikular iti sasaaden ti panawen.
