BAGUIO CITY – Nangidonar ni Benguet Cong. Eric Yap ti maysa nga ambulansiya iti Bureau of Fire Protection – Benguet.
Daytoy ket para iti panangipasigurado iti dagus a panakaipaay ti tulong kadagiti agkasapulan nangruna iti panakaispal ti biag.
Sigun kenni Yap, napateg ti panakapapigsa ti emergency response infrastructure nangruna kadagiti disaster-prone areas kas iti probinsiya para iti kinatalged ken pagimbagan dagiti umili.
Malaksid iti dayta, ti nasao a gannuat ket ipakitana ti panagtitinnulong ti gobyerno ken pribado a sektor iti pannakapatibker dagiti emergency response systems ti probinsiya iti baet ti mapaspasaran nga epekto ti panagbalbaliw ti panawen.
Namnamaen ti opisyal a dakkel ti maitulong ti alikamen iti panagresponde kadagiti medical emergencies partikular kadagiti nasulinek a lugar nu sadino limitado laeng ti panakagun-od kadagiti pasilidad ti panangtaripato iti salun-at.
