Binallaagan ni Philippine Ambassador to the United States Jose Manuel “Babes” Romualdez dagiti amin a Pilipino nga iligal nga agnanaed sadiay Estados Unidos a saanda nga urayen a dagitoy ket maideport kagiddan ti panangabak ni President elect Donald Trump.
Iti naisayangkat a forum, impaganetget ni Romualdez ti kinuna ni Trump nga amin nga iligal nga immigrants ket maideport.
Iti laksid a bassit ti bilang dagiti Pilipino nga agnanaed sadiay Estados Unidos a dumanon iti 250-K agingga 300-K, kinuna ti nasao nga opisyal a dagiti iligal ti statusna ket agboluntaryodan nga agsubli iti pagilian a Pilipinas ken iaramidda manen dagiti dokumento dagitoy gapu ta naituding a nu ti maysa nga idibidual ket naideport, posible nga awan ti namnama daytoy a makasubli iti pagilian nga Estados Unidos.
Mabalin met a makikoordinar dagiti iligal a Pilipino nga agnanaed sadiay iti Department of Migrant Workers iti Philippine Embassy sadiay Washington.
