Imbutaktak ti maysa kadagiti suspek iti panangkidnap ken panangpapatay iti Chinese businessman Anson Que (Anson Tan) ken ti drayberna ti nangibaga a ti anak ni Que ti nangibilin iti pannakakidnap ken pannakapapatayna.
Sigun kadagiti otoridad, ti 42-anyos nga anak ni Que a ni Ronxian Gou wenno Alvin Que ti maysa kadagiti innem a nagan a nairekomenda para iti umuna nga imbestigasion ti Philippine National Police Anti-Kidnapping Group (PNP – AKG) iti Department of Justice (DOJ) idi Abril 19.
Naduktalan iti inisial nga imbestigasion a ni Alvin ti nagserbi kas “negotiator” para iti pamilia bayat a ni Que ket tiniliw dagiti kidnappers.
Daytoy metlaeng ti tao a nagbayad iti umuna a P10 milion a subbot iti cryptocurrency account idi Marso 31, ken kanayonan a P3 milion iti isu met laeng nga account idi Abril 2.
Nasarakan da Tan ken ti drayberna a pimmusay kalpasan ti sumagmamano nga aldaw idi Abril 9.