Maysa kadagiti ranrantaen dagiti turista nga agturturong sadiay Atok, Benguet partikular idiay Barangay Paoay ti andap a kadawyan a mapaspasaran iti agsapa.
Sigun kenni Atok Mayor Franklin Smith, sumagmamano kadagiti agturturong sadiay ket nakakawes iti shorts wenno sleeveless gapu ta kayatda a riknaen ti lamiis.
Adda met dagiti agbanbantay sadiay a kameng iti pulisya, Bureau of Fire Protection, kasta metten dagiti tourism stakleholders a mangasistar kadagiti turista ken mangpatalinaed iti kinaurnos iti agbalbalin itan a tourism site.
Innayon ti local chief executive nga iti agdama ket awan pay dagiti nadutukan a mangipaay iti serbisyo medikal kas iti first aid kadagiti posible a makapasar iti hypothermia ngem impanamnama daytoy nga apaman nga agbalin kas maysa a tourist site ti pakapaspasamakan iti andap ket pagnunumwanda daytoy.
Malaksid kadagiti mangipaay iti first aid, posible metlaeng a maaddaan dagitoy kadagiti coffee shops a mabalin a pagistambayan dagiti sumarungkar, maysa a banag a makitkita ni Mayor Smith a makaipaay iti dakkel a tulong para iti kanayunan a pamastrekan dagiti umili.//Bombo Rob Dominguez
