BAGUIO CITY – Nainget nga ipatungpal ti Provincial Veterinary Office ti “No Entry, No Permit” kadagiti maiserserrek a livestock ken fish commodities iti masakupan ti probinsia ti Benguet mangrugi inton Pebrero 1.
Sigun kenni Provincial Veterinarian Dr. Miriam Tiongan, epektibo inton Huwebes ti Animal Quarantine Ordinance iti probinsia.
Kinunana a babaen iti daytoy ti maipanamnama ti saan panagwaras ti nagduduma a sakit dagiti dingwen a mabalin a maiyakar kadagiti konsyumer ken mabalin met a mangapektar iti operasyon ken negosyo ti livestock industry iti lokalidad.
Gapu iti daytoy, kinunana a nasken nga adda ti iparang dagiti maseknan a shipping permit tapnu maipanamnama a natalged dagiti maiturturong a produkto ti livestock iti probinsia.
Maipasdek met dagiti quarantine checkpoints iti deppaar ti Marcos Highway; Palispis – Aspiras Highway; Naguilian Road; Camp 1, Kennon Road; Benguet-Nueva Viscaya Road; Benget-Ilocos Road; La Union-Kapangan Road ken iti nagbeddengan ti Buguias, Benguet ken Mt. Province.
Sagudayen ti ordinansa a mamulta dagiti aglabsing iti nasao a linteg pakairamanan ti panakakumpiskar dagiti livestock a saan a dimmalan kadagiti quarantine areas.
