Posible a masuspinder ti klase dagiti sumagmamano a parapubliko a pagadalan iti pagilian intun Nobiembre 28, 2025.
Datoy ket gapu iti manamnama a rinnibu a bilang dagiti manursuro a makipaset iti anti-corruption protest nga isayangkat dagiti Alliance of Concerned Teachers (ACT).
Sigun iti nasao a grupo, posible a maisuro kadagiti estudiante ti accountability, justice ken systemic changes iti sektor ti edukasion ken gobierno imbes a dagiti regular lecture.
Sigun kenni ACT chairperson Ruby Bernardo, kangrunaan a pagrebbengada kas manursuro ti mangilawlawag kadagiti agtutubo ken mangidepensa iti masakbayan ti edukasion ken ti pagilian.
Innayonna a mangisayangkatda ti classroom discussions tapno masuruan dagiti estudiante maipapan iti panagsungbat wenno accountability, hustisia ken pudno a panagbalbaliw.
