BAGUIO CITY – Tarigagay ti ama ti siudad ti Baguio ti panakabukel ti maysa nga ordinansa para iti dagus a panakadusa dagiti business owners a mapaay a mangdalus iti masakupan ti negosyo dagitoy.
Kasaruno daytoy ti panakadismaya ni Mayor Benjamin Magalong iti estados dagiti sumagmamano a pasdek wenno negosyo ditoy siudad a naipasidong iti surprise inspections daytoy.
Kinunana a makapadismaya ti panangipalubos ti dadduma a personalidad iti panagbalin a narugit ti pasdek wenno ti aglawlaw ti pasdek dagitoy nga agbalbalin ita nga eyesores.
Impettengna a nasken nga adda ti aksion tapnu mailinteg ti nasao nga aramid.
Dinakamat ni Mayor Magalong a kasapulan a mangipatungpal ti Baguio iti ordinansa a mangdusa kadagiti agtagikua kadagiti narugit a pasdek babaen iti panakaipaay ti citation tickets kadagitoy.
Mangnamnama daytoy a babaen iti nasao nga addang ket dagus nga agaksion dagiti maseknan gaputa para daytoy iti pagsayaatan ti siudad.
Maipalagip nga adda ti Sanitation Code ken Environment Code ti Baguio para iti panakaipasigurado ti kinadalus ti aglawlaw ngem saan dagitoy a mangipatpataw iti dagus a pannusa.
