Impila ni Senate Deputy Majority Leader JV Ejercito ti Anti-Online Hate and Harassment Bill wenno ti Emman Atienza Bill.
Panggep daytoy a malabanan ti cyberbullying, fake news ken online defamation.
Nainagan ti nasao a gakat iti pimmusay nga anak ni TV personality Kim Atienza a ni Emmanuel “Emman” Etienza.
Ti nasao a gakat ket konektado iti agdama a linteg ti pagilian a kas ti Cybercrime Prevention Act ken Anti-Bullying Act babaen ti panangdusa kadagiti agaramid ti cyberlibel, hate speech, cyberstalking, ken saan nga otorisado a panangiwaras iti pribado nga impormasion.
Iti sidong ti naisingasing a gakat, kasapulan nga ikkaten wenno lapdan dagiti digital platform dagiti harmful content iti uneg ti 24 nga oras.
Mangipasdek pay daytoy ti Victim Support and Protection Program tapno mangipaay iti psychosocial counseling, legal assistance, ken protection services babaen ti DSWD, DOJ, ken DOH.
Dagiti nakabasol ket agmulta iti ₱50,000 agingga iti ₱200,000 ken posible a maibalud, bayat a dagiti menor de edad a nairaman ket maipasidong iti counseling ken education.
Impaganetget ni Senator Ejercito a saan a nairanta ti bill a manglapped iti free speech no di ket tapno maparegta ti accountability ken kindness online.
