BAGUIO CITY – Nangrugin ti nainget a panakaipatungpal ti ordinansa a mangipawpawil iti panagaramat ti plastic, polystyrene ken dadduma a synthetic packaging materials iti masakupan ti La Trinidad, Benguet.
Nailanad iti Municipal Ordinance No. 11 series of 2015 a makadadael iti aglawlaw ken kaaduan a basura sadiay La Trinidad dagiti plastik, styrofoam ken dadduma a synthetic materials.
Panggep ti ordinansa a kissayan ti polusyon nga ituntunda ti panagaramat kadagiti plastic tapnu masalwadan ti aglawlaw.
Sigun kadagiti stall owners iti merkado publiko sadiay La Trinidad a nakapatang ti Bombo Radyo, tumultulongda iti panakaipalawag ti ordinansa kadagiti umili ken kadagiti sangaili a gumatgatang kadagitoy.
Naobserbaran a kaaduan met kadagiti stall owners sadiay ti agilaklako kadagiti ecobags ken agar-aramat metten dagiti vendors iti food court iti New Public Market kadagiti paper bags kas pangbungon kadagiti take-out orders dagiti kostumer dagitoy nupay agtaltalinaed nga styrofoam ti pangikabilan iti take out orders.
Maipalpalubos met ti panagaramat dagiti vendors iti wet section ti merkado plastic bags ngem makidkiddaw latta ti panagimet dagiti market-goers iti container wenno bayong a pagkabilan iti gatangenda a lames wenno karne.
Mailaksid pay iti ordinansa dagiti wholesalers ti nateng iti La Trinidad Vegetable Trading Post ngem maibalbalakad latta ti panagaramat dagitoy iti biodegradable, reusable alternative products ken containers iti packaging dagiti nateng dagitoy a maibiahe iti ruar ti probinsia.
Narugian metten dagiti fast food chains ken nalalatak nga eastablishimiento sadiay La Trinidad nga agaramat iti paper bags para iti take-out wenno ginatang ti kustomer dagitoy.
Naituding a mamulta iti P1,000 agingga P2,500 dagiti aglabsing iti ordinansa.
