BAGUIO CITY – Impadas ti City Engineering Office (CEO) ti anti-slip coating solution kadagiti tactile pavements iti Baguio City idi kalman tapno maksayan ti kinagalis dagitoy.
Ti nasao nga addang ket tapno maliklikan ti aksidente kadagiti indibidual a makabaddek kadagitoy nangruna iti panawen ti panagtutudo.
Sigun kenni City Engineer Edgar Victorio Olpindo, impadas da ti nairekomendar nga no-slip coating solution nu sadino ginarantiya dagiti supplier nga one-time application daytoy ken makakissay iti kinagalis dagiti tiles.
Nupay kasta, impetteng ti opisyal nga obserbaran da pay ti kina-epektibo daytoy nu agbayad.
Immunan nga impasardeng ti DPWH-Baguio ken kasta metten ni Mayor Benjamin Magalong ti panakaimuntar dagiti tactile pavements kadagiti side walks iti siyudad kasaruno ti reklamo dagiti umili a mangitunda iti aksidente.
