Dumanunen iti 7.5 million ti bilang dagiti tattao a naapektaran iti epekto dagiti bagyo a Luis, Maymay, Neneng ken ti habagat.
Maibasar iti kaudian a datos nga inrekord ti National Disaster Risk Reduction and Management Council (NDRRMC) agingga iti Agosto 23, buklen daytoy ti agarup 2.1 milion a pamilia manipud iti Ilocos Region, Cagayan Valley, Central Luzon, Bicol Region, Western Visayas, Zamboanga Peninsula, Cordillera, Metro Manila, Calabarzon, ken Mimaropa.
Iti pakabuklan a bilang, 9,872 a pamilia wenno 34,103 nga indibidual ti agtalinaed kadagiti evacuation centers.
Kabayatanna, agtaltalinaed a 29 ti bilang dagiti pimmusay, 19 dagiti nadangran ken tallo ti mapukpukaw.
Sigun iti NDRRMC, 2,600 a balbalay ti partially damaged bayat a 269 ti totally damage.
Dumanon iti mapattapatta a P4.9 bilion ti pannakadadael ti imprastruktura, idinto a P1.7 bilion ti nailista a pannakadadael ti agrikultura.